ཕྱི་ལོ་ ༢༠༡༨ ཟླ་ ༣ ཚེས་ ༡ ཉིན་གུང་ཡོལ་ཚོུད་གསུམ་པའི་ཐོག་གཏེར་སྒར་འདུས་ཁང་ནང་བླ་མའི་སྲི་ཞུ་བ་དང་། སྨོན་ལམ་ཚོགས་མི་རྣམས་ལ་༧སྐྱབས་རྗེ་རྒྱལ་བའི་རྒྱལ་ཚབ་མཆོག་ནས་བཀའ་སློབ་ལམ་སྟོན་ཕེབས་གསལ་དུ། “སྤྱིར་ད་ལྟའི་རྣམ་འདྲེན་བཞི་པ་སངས་རྒྱས་ཤཱཀྱ་ཐུབ་པའི་བསྟན་པ་ཡིན་པ་དང་། མ་འོངས་རྣམ་འདྲེན་དྲུག་པ་སེངྒེ་སྒྲ་དེ་ཉིད་རང་རེའི་མགོན་དཔུང་བླ་ན་མ་མཆིས་པ་༧དཔལ་རྒྱལ་དབང་ཀརྨ་པ་འདི་ཉིད་ཡིན་ཞིང་། སངས་རྒྱས་རྣམས་མཐའ་མེད་པའི་སེམས་ཅན་གྱི་དོན་མཛད་པོ་ཡིན་པས། ད་ལྟ་ཁྱེད་རང་ཚོས་སངས་རྒྱས་ཀརྨ་པའི་ཞབས་ཏོག་བསྒྲུབ་པ་འདི་སྐལ་བ་བཟང་ཞིང་བསོད་ནམས་དཔག་ཏུ་མེད་པ་ཡིན། དེ་ཙམ་མ་ཟད་སངས་རྒྱས་ཀརྨ་པའི་འདས་པའི་སྐུ་ཕྲེང་བཅུ་དྲུག་དང་། མ་འོངས་འབྱུང་འགྱུར་གྱི་སྐུ་ཕྲེང་ཉེར་ལྔ་པོ་ཐམས་ཅད་ལ་ཞབས་ཏོག་ཞུས་པ་སྒོ་ཀུན་ནས་མཚུངས་པ་ཡིན། ཁྱེད་རྣམ་གྱི་ཞབས་ཏོག་སྣ་རེ་བསྒྲུབ་པ་དེ་ཡང་ཡུན་རིང་ཞིང་ཚད་མེད་པ་ཡིན།” ཞེས་བཀའ་སྩལ།
དེ་རྗེས་༧རྒྱལ་དབང་ཀརྨ་པ་ཆེན་པོ་མཆོག་ནས་དྲ་རྒྱུད་བཀའ་སྩལ་དོན།
བཀའ་བརྒྱུད་སྨོན་ལམ་ཐེངས་སུམ་ཅུ་སོ་ལྔ་པའི་སྨོན་ལམ་གྱི་ཚོགས་མི་ཚོ་དང་དེ་བཞིན་བླ་མའི་སྲི་ཞུ་བ་རྣམ་པ་ཚོ་ཚང་མ་ལ་ད་རིང་གོ་སྐབས་འདི་དང་བསྟུན་ནས་ཚང་མ་ལ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། ད་རེ་སྨོན་ལམ་ཐེངས་སུམ་ཅུ་སོ་ལྔ་པ་འདི་ཡི་ཐོག་ལ་ང་རང་དངོས་སུ་བཅར་བའི་གོ་སྐབས་མ་བྱུང་བ་རེད། ཡིན་ན་ཡང་གཟུགས་པོ་འདི་ཐག་རིང་དུ་ཡོད་པ་ཡིན་ན་ཡང་སེམས་པ་འདི་རྣམ་པ་ལྷན་རྒྱས་ཚོ་དང་མཉམ་དུ་སྨོན་ལམ་ལ་ཚོགས་བཅར་ཞུས་ཡོད་བསམ་པ་ཞིག་མོས་པ་བྱེད་ཀྱི་ཡོད། དེ་ག་ནང་བཞིན་ཁ་ཙང་ཉི་མ་བཞི་ཡི་རིང་ལ་ཆོས་འབྲེལ་པོ་ཏོ་བའི་ཆིག་ལབ་རིང་མོའི་ཐོག་ནས་བྱས་པ་རེད་དེས་ང་རང་ཚོ་ཚང་མ་ཆོས་ཀྱི་འབྲེལ་བ་བཟང་པོ་གང་ལ་གང་འཚམས་ཤིག་བྱུང་ཡོད། དེ་འདྲ་ཡིན་དུས་ཙ་ནས། དེ་ཡི་རྒྱུ་མཚན་ལ་བརྟེན་ནས་རྣམ་པ་ལྷན་རྒྱས་མང་པོ་ཞིག་གིས་ད་དེ་རིང་ང་ཐུག་ཐུབ་མ་སོང་བསམ་པ་དེ་འདྲ་དྲན་བསྡད་མཁན་དེ་འདྲ་ཡོང་བསྡད་ཀྱི་ཡོད་རེད། ཡིན་པ་ཡིན་ན་ཡང་དོན་དམ་ལ་ང་རང་ཚོ་ཐུག་འཕྲད་བྱེད་པ་དང་གཅིག་པ་འདྲ་པོ་ཆགས་བསྡད་ཡོད། དེ་འདྲ་སོང་ཙང་ཁྱེད་རང་ཚོ་ཡིན་ན་ཡང་བློ་ཚིམ་པ་ལྟ་བུ་དང་། སེམས་པ་སྐྱིད་པོ་ལྟ་བུ་ཞིག་ཡོང་བའི་སྨོན་འདུན་ཞུ་བཞིན་ཡོད། ད་རྣམ་པ་ལྷན་རྒྱས་ཚོས་མཁྱེན་གསལ་ལྟར་རེད་བཀའ་བརྒྱུད་སྨོན་ལམ་འདི་ཐོག་མ་བརྒྱད་ཅུ་གྱ་གྲངས་ནང་ལ་སྐྱབས་རྗེ་ཀ་ལུ་རིན་པོ་ཆེ་སྐུ་གོང་མ་དང་སྐྱབས་རྗེ་འབོ་དཀར་རིན་པོ་ཆེ་ཞི་བར་གཤེགས་པ་རྣམ་གཉིས་ཀྱི་ཐུགས་རྗེ་བཀའ་དྲིན་ལ་བརྟེན་ནས་གསར་དུ་དབུ་བརྙེས་པ་ལྟ་བུ་ཆགས་ཡོད། ཡིན་ན་ཡང་ལོ་རྒྱུས་ཀྱི་ཐོག་ནས་བཤད་པ་ཡིན་ན་༧རྒྱལ་དབང་ཀརྨ་པ་བདུན་པ་ཆོས་གྲགས་རྒྱ་མཚོའི་སྐབས་ནས་སྒར་ཆེན་སྨོན་ལམ་ཆེན་མོ་ཞེས་རྒྱ་ཆེན་པོ་ཞིག་འཚོགས་པའི་ལམ་ལུགས་སྔོན་ནས་ཡོད་པ་ལྟ་བུ་རེད། དེ་འདྲ་ཡིན་དུས་ང་རང་རྒྱ་གར་ལ་སླེབས་ཚར་བའི་རྗེས་ལ་བཀའ་བརྒྱུད་སྨོན་ལམ་དང་ག་ལེ་ག་ལེ་འབྲེལ་བ་ཆགས་ནས་དངོས་སུ་ང་རང་བཀའ་བརྒྱུད་སྨོན་ལམ་གྱི་ལས་འགན་ཐོག་འགན་འཁུར་བྱས་ཏེ་ལོ་ངོ་ཕལ་ཆེར་བཅུ་གཅིག་ཙམ་འགྲོ་བཞིན་ཡོད། དེའི་ནང་ལ་ཡིན་ན་ཡང་གཙོ་ཆེ་ཤོས་དགེ་འདུན་པ་དང་། འདུས་པ་ཡོངས་ཀྱིས་རྒྱབ་སྐྱོར་ལ་བརྟེན་ནས་ད་ལྟ་ཡིན་པ་ཡིན་ན་བཀའ་བརྒྱུད་སྨོན་ལམ་འདི་རྒྱ་བསྐྱེད་རང་བཞིན་ནམ། ཞི་བདེ་ཆེན་པོ་ལྟ་བུ་ཞིག་ཆགས་ཀྱི་ཡོད། དེ་ཡི་ཐོག་ལ་མི་རིགས་དང་སྐད་རིགས་མི་གཅིག་པ་མང་པོ་ཞིག་ཀྱང་འཛོམས་ཡོད། དེ་ཡིན་པ་ཡིན་ན་སྔར་ཀརྨ་པ་སྐུ་གོང་མ་རྣམ་པས། ཡུལ་དང་སྐད་རིགས་མི་གཅིག་པ། །མི་རིགས་རྣམ་པ་སྣ་ཚོགས་པའི། །བདེ་སྐྱིད་ཡང་ཡང་དེར་འཛོམས་ཤོག །དེ་ལྟ་བུའི་ཐུགས་སྨོན་མཛད་པ་འདི་དངོས་སུ་ད་ལྟ་ང་རང་ཚོའི་མིག་ལམ་དུ་དངོས་སུ་གྲུབ་པ་ལྟ་བུ་ཆགས་ཡོད། དེའི་རྒྱུ་མཚན་ལ་བརྟེན་ནས་མ་འོངས་པའི་ཆ་ལ་ཡང་ང་ཚོ་ད་ལྟའི་འཛམ་བུ་གླིང་འདི་ཕྱོགས་གཅིག་ནས་ཁོར་ཡུག་གི་གནས་སྟངས་ཐོག་ནས་བཤད་ནའང་དཀའ་ལས་ཁག་པོ་ཆགས་ཡོད། དེ་བཞིན་ལུང་པ་མང་པོའི་ནང་ཆབ་སྲིད་ཀྱི་གནས་སྟངས། བདེ་འཇགས་ཀྱི་གནས་སྟངས་ཡིན་ན་ཡང་དེ་ཙམ་གྱི་བརྟན་པོ་མེད་པ། དེ་བཞིན་ལུང་པ་མང་པོའི་ནང་དམག་འཁྲུག་སོགས་དང་། དེ་བཞིན་ནད་དང་མུ་གེ་དང་། འབྱུང་བའི་འཇིག་པ་ལ་སོགས་མང་པོ་ཞིག་འབྱུང་བཞིན་ཡོད། དེའི་རྒྱུ་མཚན་ལ་བརྟེན་ནས་ང་ཚོས་ངེས་པར་དུ་བཟང་ཕྱོགས་ཀྱི་ནུས་པ་ཟེར་ན་འང་འདྲ་འདུག །དགེ་བའི་སྟོབས་དགོས་པ་འདི་གལ་ཆེན་པོ་ཞིག་ཆགས་ཡོད། རྒྱུ་མཚན་དེ་ལ་བརྟེན་ནས་བཀའ་བརྒྱུད་སྨོན་ལམ་གྱི་དམིགས་ཡུལ་གཙོ་བོ་དེ་གང་རེད་ཅེ་ན། དགེ་བའི་ནུས་པ་འདི་གོང་འཕེལ་དུ་གཏོང་བ་དང་། དགེ་བ་བཟང་པོ་ལ་བཅང་བའི་རེ་བའམ་ཡིད་ཆེས་འདི་ཉམས་གུད་དུ་མི་འགྲོ་བར་གོང་ནས་གོང་དུ་འགྲོ་བའི་ཆེད་དུ་ད་བར་ང་ཚོས་བཀའ་བརྒྱུད་སྨོན་ལམ་ཚོགས་ཀྱི་ཡོད། རྣམ་པ་ལྷན་རྒྱས་ཚང་མའི་ངོས་ནས་ཀྱང་སྨོན་ལམ་གྱི་ཚོགས་པ་ལ་དངོས་སུ་ཞུགས་ཏེ་སོ་སོའི་སེམས་ཀྱི་ཚོར་བ་ཡིན་ན་ཡང་མི་འདྲ་བ་ཞིག་སྐྱེས་ཐུབ་པའི་རེ་བ་བྱེད་བཞིན་ཡོད། ལྷག་པར་དུ་བླ་མའི་སྲི་ཞུ་བ་ཁྱེད་རང་ཚོ་ཡིན་ན་ཡང་ཉིན་མཚན་མེད་པར་དཀའ་ལས་མང་པོ་རྒྱབ་སྟེ་ཁྱེད་རང་ཚོས་འབད་བརྩོན་མང་པོ་ཞིག་གནང་ཡོད། དེ་དག་ཚང་མ་ལ་དམིགས་བསལ་གྱི་ཐུགས་རྗེ་ཆེ་ཞུ་རྒྱུ་ཡིན། དེ་རིང་སྐྱབས་རྗེ་རྒྱལ་ཚབ་རིན་པོ་ཆེ་མཆོག་གི་ངའི་ཚབ་བྱས་ཟེར་ནའང་འདྲ་འདུག །གང་ལྟར་ཡང་རིན་པོ་ཆེ་ཁོང་ནི་ཀརྨ་ཀཾ་ཚང་གི་རྒྱལ་བ་ཡབ་སྲས་ཀྱི་གྲས་ཤིག་ཆགས་ཡོད། མ་ཟད་རྒྱལ་བ་ཀརྨ་པ་སྐུ་ཕྲེང་བཅུ་དྲུག་པའི་སྲས་ཀྱི་ཐུ་བོའི་གྲས་ཀྱང་ཆགས་ཡོད། དེའི་སྐུ་མདུན་ནས་ཁྱེད་རང་ཚོས་བྱིན་རླབས་ཞུས་པ་དང་། དེ་བཞིན་ཆོས་འབྲེལ་ཞུས་བའི་གོ་སྐབས་ཐོབ་པ་འདི་སྐལ་བ་བཟང་པོ་ཞེ་དྲག་རེད། རྒྱུ་མཚན་དེ་འདྲ་སོང་ཙང་གང་ཅིའི་ཆ་ནས། ངས་ཁྱེད་ཚོ་ཚང་མ་ལ་བློ་ཡིད་ཚིམས་པ་ཞིག་དང་སེམས་དགའ་པོ་བྱུང་ཡོད་པའི་རེ་བ་བྱེད་བཞིན་ཡོད། ཉེ་ཆར་བོད་ཀྱི་ལོ་གསར་དང་རྒྱ་ཡི་ལོ་གསར་ཚེས་བཞིན་པ་ལྟ་བུ་ཆགས་ཀྱི་ཡོད། དེ་རིང་གི་གོ་སྐབས་འདི་དང་བསྟུན་ནས་ལོ་གསར་པའི་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་དང་། ལོ་གསར་པའི་ནང་ཡང་རྣམ་པ་ལྷན་རྒྱས་ཚང་མ་སྐུ་གཟུགས་གསལ་ཐང་ཡོང་བ་དང་། བསམ་པའི་དོན་ཐམས་ཅད་ཆོས་བཞིན་དུ་འགྲུབ་བའི་སྨོན་འདུན་ཞུ་བཞིན་ཡོད། ཡང་བསྐྱར་ཚང་མ་ལ་བཀའ་བརྒྱུད་སྨོན་ལམ་འདི་ཡི་ཐོག་ཏུ་ཕེབས་ཏེ་སོ་སོ་རང་ཉིད་ཀྱི་དགེ་བ་གོང་འཕེལ་དུ་བཏང་བ་ཡིན་ན་ཡང་རེད། དེ་བཞིན་དཀོན་མཆོག་ལ་མཆོད་པ། སྤྲང་པོ་ལ་སྦྱིན་གཏོང་བྱེད་པ་ལ་སོགས་དགེ་བ་གང་ལ་གང་འཚམས་ཤིག་བྱུང་ཡོད། ད་གཙོ་ཆེ་ཤོས་འདི་མ་འོངས་པའི་མི་ཚེའི་ནང་དགེ་བའི་ནུས་མཐུ་གོང་འཕེལ་དུ་གཏང་ནས། སོ་སོའི་མི་ཚེ་འདི་དོན་དང་ལྡན་པ་འོང་བ་ཞིག་དང་། རང་གཞན་དོན་གཉིས་གྲུབ་པ་ཞིག་འོང་བའི་སྨོན་འདུན་ཞུ་བཞིན་ཡོད། ཐུགས་རྗེ་ཆེ། ཞེས་བཀའ་བསྩལ་ཏོ། །བསམ་གཏན་མཐར་ཕྱིན་ནས།
